கூச்சிங், நவம்பர் 3: தனது வங்கிக் கணக்கைப் பயன்படுத்தி இரண்டு சந்தர்ப்பங்களில் மொத்தம் RM450,000 மதிப்பிலான சட்டவிரோதப் பணப் பரிவர்த்தனைகளில் நேரடியாக ஈடுபட்ட 39 வயது ஆடவருக்கு கூச்சிங் செஷன்ஸ் நீதிமன்றம் RM90,000 அபராதம் விதித்துள்ளது.
இந்த அபராதத்தைச் செலுத்தத் தவறினால் 24 மாதங்கள் சிறைத்தண்டனை அனுபவிக்க வேண்டும் என்றும் நீதிமன்றம் உத்தரவிட்டுள்ளது.
சோங் நியேக் சியூ (Chong Nyek Chew) என்ற அந்த ஆடவர், இரு குற்றச்சாட்டுகளையும் ஒப்புக்கொள்ள முடிவு செய்து தனது முந்தைய வாக்குமூலத்தை மாற்றியதைத் தொடர்ந்து, நீதிபதி ஷாஃபிசா டத்து அப்துல் ரசாக் ட்ரெடி இந்தத் தண்டனையை விதித்தார்.
குற்றவியல் சட்டத்தின் பிரிவு 424C(1)-இன் கீழ் அவர் மீது குற்றச்சாட்டுகள் சுமத்தப்பட்டிருந்தன.
இப்பிரிவின்படி, குற்றம் நிரூபிக்கப்பட்டால் மூன்று முதல் 10 ஆண்டுகள் வரை சிறைத்தண்டனை அல்லது RM10,000 முதல் RM150,000 வரை அபராதம் அல்லது இரண்டும் விதிக்கப்படலாம்.
திருத்தப்பட்ட முதல் குற்றச்சாட்டுக்கு RM10,000 அபராதமும், அதனைச் செலுத்தத் தவறினால் 12 மாதங்கள் சிறைத்தண்டனையும் விதிக்கப்பட்டது.
இரண்டாவது குற்றச்சாட்டுக்கு RM80,000 அபராதமும், அதனைச் செலுத்தத் தவறினால் மேலும் 12 மாதங்கள் சிறைத்தண்டனையும் விதிக்கப்பட்டது.
குற்றப்பத்திரிகையின்படி, 2025ஆம் ஆண்டு நவம்பர் 1 மற்றும் நவம்பர் 3 ஆகிய தேதிகளில், சட்டபூர்வமான நோக்கமின்றி கூச்சிங்கில் உள்ள ஒரு வங்கியில் தமது கணக்கைப் பயன்படுத்தி இரண்டு தனித்தனி சந்தர்ப்பங்களில் சட்டவிரோதப் பணப் பரிவர்த்தனைகளில் அவர் நேரடியாக ஈடுபட்டுள்ளார்.
RM160 மில்லியன் சந்தேகப் பரிவர்த்தனைகள் குறித்து புகார்
வழக்கு விசாரணையின் உண்மை விவரங்களின்படி, அந்த வங்கியின் டிஜிட்டல் வங்கிச் சேவைப் பிரிவைச் சேர்ந்த நிர்வாக அதிகாரி ஒருவருக்கு, நிறுவனப் பரிவர்த்தனைச் செயல்பாட்டுப் பிரிவிலிருந்து சந்தேகத்திற்குரிய பணப் பரிவர்த்தனைகள் குறித்த தகவல் கிடைத்தது.
வங்கியின் மொத்தம் RM160 மில்லியன் நிதி சம்பந்தப்பட்ட பல சந்தேகத்திற்குரிய பரிவர்த்தனைகள் தொடர்பாக அந்தத் தகவல் வழங்கப்பட்டது.
இதனைத் தொடர்ந்து காவல்துறையில் புகார் அளிக்கப்பட்டது. வங்கி மேற்கொண்ட மேலதிக ஆய்வில், 2025ஆம் ஆண்டு அக்டோபர் 28 முதல் நவம்பர் 3ஆம் தேதி வரை சட்டவிரோதப் பணப் பரிவர்த்தனைகள் இடம்பெற்றிருப்பது கண்டறியப்பட்டது.
பின்னர் அளிக்கப்பட்ட இரண்டாவது காவல்துறைப் புகாரில், மொத்தம் RM203.82 மில்லியன் சட்டவிரோதமாகப் பல உள்ளூர் வங்கிக் கணக்குகளுக்கு மாற்றப்பட்டிருந்தது தெரியவந்தது.
வங்கியின் கணினி அமைப்பு ஊடுருவப்பட்டதா?
காவல்துறையின் மேலதிக விசாரணையில், வங்கியின் கணினி அமைப்பில் பதிவாகியிருந்த பணப் பரிவர்த்தனை விவரங்களுக்கும், PayNet நிறுவனத்தின் நிகழ்நேர சில்லறைப் பணப்பரிவர்த்தனைப் பதிவுகளுக்கும் இடையே முரண்பாடுகள் இருப்பது கண்டறியப்பட்டது.
மேலும், மேற்கொள்ளப்பட்ட மின்னணு ஆய்வுகளில் வங்கியின் கணினி அமைப்பு ஊடுருவலுக்கு உள்ளாகியிருந்ததற்கான அறிகுறிகள் தெரியவந்தன.
இதன் காரணமாகவே அனுமதியற்ற முறையில் வங்கிப் பணம் பல கணக்குகளுக்கு மாற்றப்பட்டதாக விசாரணையில் தெரிவிக்கப்பட்டது.
இந்த வழக்கில் புத்ராஜெயாவில் உள்ள சட்டத்துறைத் தலைவர் அலுவலகத்தின் வழக்குத் தொடர்ப்புப் பிரிவைச் சேர்ந்த வணிக மற்றும் இணையக் குற்றப்பிரிவு துணை அரசு வழக்கறிஞர் ஷுகோர் அபு பக்கார் வழக்கை முன்னெடுத்தார்.
குற்றஞ்சாட்டப்பட்ட சோங் நியேக் சியூ சார்பில் வழக்கறிஞர் தியோங் இங் நெங் ஆஜரானார்.