சிங்கப்பூர், செப்டம்பர் 23: அக்டோபர் 6, 2026 முதல், சிங்கப்பூருக்குள் தரைவழியாக நுழையும் அனைத்துப் பதிவு செய்யப்பட்ட வெளிநாட்டு வாகனங்களும் செல்லுபடியாகும் வாகன நுழைவு அனுமதிப்பத்திரம் (VEP) வைத்திருக்க வேண்டும் என சிங்கப்பூர் குடிவரவு மற்றும் சோதனைச் சாவடிகள் ஆணையம் (ICA) தெரிவித்துள்ளது.
வுட்லண்ட்ஸ் அல்லது துவாஸ் சோதனைச் சாவடி வழியாக காரில் சிங்கப்பூர் செல்லும் பயணிகள், SG Arrival Card (SGAC) சமர்ப்பிப்பதற்கு முன், தங்கள் வாகனத்திற்குச் செல்லுபடியாகும் VEP இருப்பதை உறுதி செய்ய வேண்டும்.
SGAC சமர்ப்பிக்கும்போது வாகனத்தின் VEP நிலை சரிபார்க்கப்படும். செல்லுபடியாகும் VEP இல்லையெனில், பயணிகள் SG Arrival Card சமர்ப்பிப்பை நிறைவு செய்ய முடியாது என்றும், பயணத்திற்கு முன் VEP-க்கு விண்ணப்பிக்க அறிவுறுத்தப்படுவார்கள் என்றும் ICA தெரிவித்துள்ளது.
மேலும், செல்லுபடியாகும் VEP இருப்பது சிங்கப்பூரில் வாகனத்திற்குத் தேவையான மோட்டார் காப்பீட்டுத் திட்டம் இருப்பதையும் உறுதி செய்ய உதவும். சிங்கப்பூரில் தங்கும் முழு காலத்திற்கும் செல்லுபடியாகும் மோட்டார் காப்பீடு வைத்திருப்பது VEP பெறுவதற்கான கட்டாய நிபந்தனையாகும்.
இந்த முன்கூட்டிய சரிபார்ப்பு, பயணத்திற்கு முன்பே வாகனம் முறையான காப்பீட்டைக் கொண்டுள்ளதா என்பதை பயணிகள் உறுதி செய்ய உதவும் என ICA தெரிவித்துள்ளது.