பாங்காக், நவம்பர் 6 : சுமார் 3 கோடி முதல் 3.5 கோடி ஆண்டுகளுக்கு முன்பு, இன்றைய தெற்கு தாய்லாந்துப் பகுதியில் சுமார் 30 கிலோகிராம் எடை கொண்ட ராட்சத எலி போன்ற கொறித்துண்ணி விலங்கு வாழ்ந்ததாக விஞ்ஞானிகள் கண்டறிந்துள்ளனர்.
புதைபடிவமாகக் கிடைத்த இரண்டு பற்களை ஆய்வு செய்ததன் மூலம், இதுவரை அறியப்படாத புதிய விலங்கு இனம் ஒன்றை ஆராய்ச்சியாளர்கள் அடையாளம் கண்டுள்ளனர்.
‘ராட்சத எலி’ என ஆய்வுக் குழுவைச் சேர்ந்த புவியியலாளர் ஒருவர் வர்ணித்துள்ள இந்தப் பழங்கால விலங்கு, பேலியோஜீன் (Paleogene) காலகட்டத்தில் வாழ்ந்த மிகப்பெரிய கொறித்துண்ணி இனங்களில் ஒன்றாக இருந்திருக்கலாம் எனக் கூறப்படுகிறது.
இந்தக் கண்டுபிடிப்பு, தொடக்ககால கொறித்துண்ணிகள் எவ்வாறு மிகப்பெரிய உடல் அளவுக்கு பரிணமித்தன என்பதைப் புரிந்துகொள்ளப் புதிய தகவல்களை வழங்கியுள்ளது.
இந்த ஆய்வின் முடிவுகள் புதன்கிழமை ‘Scientific Reports’ என்ற அறிவியல் இதழில் வெளியிடப்பட்டன.
கடந்த 2004ஆம் ஆண்டு தெற்கு தாய்லாந்தின் கிராபி (Krabi) மாகாணத்தில் உள்ள நிலக்கரிச் சுரங்கம் ஒன்றில் கண்டெடுக்கப்பட்ட கடைவாய்ப் பல் மற்றும் முன்பல் ஆகிய இரண்டு புதைபடிவங்களின் அடிப்படையில் இந்த ஆய்வு மேற்கொள்ளப்பட்டது.
முன்பல்லைக் கண்டுபிடித்த தாய்லாந்தின் கனிம வளத் துறையைச் சேர்ந்த புவியியலாளர் பன்னிபா தியான் கூறுகையில், அதன் வழக்கத்திற்கு மாறான பெரிய அளவு காரணமாக ஆரம்பத்தில் அது வேறு ஏதோ விலங்கின் எலும்பு எனத் தவறாக நினைத்ததாகத் தெரிவித்தார்.
51 வயதான அவர் AFP செய்தி நிறுவனத்திடம் கூறுகையில், “முதலில் அது ஓர் எலும்பு என்று நினைத்தேன். அதை எனது மேலதிகாரியிடம் காட்டியபோது, அது ஒரு ராட்சத எலியின் பல் என்று அவர் தெரிவித்தார்” என்றார்.
கிரீம் நிறத்தில் காணப்பட்ட அந்தப் புதைபடிவ முன்பல், கருமையான நிலக்கரிப் படிவங்களுக்கு இடையே தெளிவாகத் தெரிந்தது. அதே நாளில் ஆய்வுப் பயணத்தில் பங்கேற்ற மற்றொரு உறுப்பினர் கருமை நிறக் கடைவாய்ப் பல்லையும் கண்டெடுத்தார்.
கிராபி பகுதியில் இதற்கு முன்பும் பழங்காலக் குரங்குகள், மாமிச உண்ணி விலங்குகள் மற்றும் குளம்புகளைக் கொண்ட பாலூட்டிகளின் புதைபடிவங்கள் கண்டெடுக்கப்பட்டுள்ளன.
இருப்பினும், இந்த இரண்டு பற்கள் கண்டெடுக்கப்பட்ட காலத்தில், அந்த விலங்கு எந்த இனத்தைச் சேர்ந்தது என்பதைத் துல்லியமாகக் கண்டறியத் தேவையான ஆதாரங்களும் தொழில்நுட்ப வசதிகளும் ஆய்வுக் குழுவிடம் போதுமானதாக இருக்கவில்லை.
இரண்டு தசாப்தங்களுக்கும் மேலாகக் கடந்த நிலையில், தாய்லாந்து, பிரான்ஸ் மற்றும் கனடாவைச் சேர்ந்த ஆராய்ச்சியாளர்கள் பற்களை நுணுக்கமாக ஆய்வு செய்து புதிய விலங்கு இனத்தை அடையாளம் கண்டுள்ளனர்.
இந்த விலங்கு சுமார் 30 கிலோகிராம் எடை கொண்டிருந்திருக்கலாம் என விஞ்ஞானிகள் மதிப்பிட்டுள்ளனர். உலகின் மிகப்பெரிய தற்போதைய கொறித்துண்ணியான தென் அமெரிக்காவின் கேப்பிபராவின் (Capybara) எடையில் இது சுமார் பாதியாகும்.
எனினும், கேப்பிபராவைப் போலல்லாமல், இந்தப் பழங்கால விலங்கு தற்போது முற்றிலும் அழிந்துவிட்ட Ischyromyidae என்ற குடும்பத்தைச் சேர்ந்ததாகும். இது கொறித்துண்ணிகளின் மிகப் பழமையான முக்கியக் குழுக்களில் ஒன்றாகக் கருதப்படுகிறது.
இந்தக் கண்டுபிடிப்பு கடந்த காலங்களில் பூமியில் நிலவிய உயிரினங்களின் பன்முகத்தன்மை குறித்து பல தகவல்களை வெளிப்படுத்துவதாக பன்னிபா குறிப்பிட்டார்.
மேலும், பழங்காலக் கொறித்துண்ணிகள் இன்றைய தாய்லாந்துப் பகுதியில் தோன்றி, பின்னர் உலகின் பிற பகுதிகளுக்குப் பரவியிருக்கலாம் என்றும் அவர் கருத்துத் தெரிவித்துள்ளார்.
ஆனால், இதுவரை இரண்டு பற்கள் மட்டுமே கிடைத்துள்ளதால், அந்த விலங்கின் உடல் தோற்றம், உணவுப் பழக்கம் மற்றும் வாழ்க்கை முறை குறித்து உறுதியாகக் கூற முடியாத நிலை உள்ளது.
இந்தப் புதிய விலங்கு இனத்துக்கு, அறிவியல் மற்றும் தொல்லுயிரியல் ஆய்வுகளுக்கு ஆதரவளித்து வரும் தாய்லாந்து இளவரசி சிரிந்தோர்னின் நினைவாக Yakamys sirindhornae எனப் பெயரிடப்பட்டுள்ளது.