ஜோகூர் பாரு, அக்டோபர் 28: மலேசிய எல்லைக் கட்டுப்பாடு மற்றும் பாதுகாப்பு முகமை (AKPS), ஜோகூர் பாருவில் உள்ள சுல்தான் இஸ்கந்தர் சுங்கம், குடிவரவு மற்றும் தனிமைப்படுத்தல் வளாகத்தில் (BSI) நேற்று அறிவிக்கப்படாததாகச் சந்தேகிக்கப்படும் RM1.97 மில்லியன் மலேசிய ரிங்கிட் மற்றும் 300,000 சிங்கப்பூர் டாலர் ரொக்கப் பணத்தைப் பறிமுதல் செய்துள்ளது.
நேற்று காலை சுமார் 11.40 மணியளவில், சிங்கப்பூரின் உட்லண்ட்ஸ் நோக்கிச் செல்லும் வாகனச் சோதனைப் பகுதியில் இந்தப் பறிமுதல் நடவடிக்கை மேற்கொள்ளப்பட்டது. இதில், 41 மற்றும் 42 வயதுடைய மலேசியப் பிரஜைகளான கணவன், மனைவி எனச் சந்தேகிக்கப்படும் இருவர் தொடர்புபட்டுள்ளனர்.
AKPS அமைப்பின் செயல்பாட்டுப் பிரிவுக்கான துணைத் தலைமை இயக்குநர் டத்தோ முகமட் நசாருடின் எம். நசீர் தெரிவிக்கையில், வெள்ளை நிற டொயோட்டா அல்பார்ட் பல்நோக்கு வாகனத்தில் (MPV) பயணம் செய்த அந்தத் தம்பதியினரிடம் மேற்கொள்ளப்பட்ட சோதனையின்போது ரொக்கப் பணம் கண்டுபிடிக்கப்பட்டதாகக் கூறினார்.
பணியில் இருந்த அதிகாரிகள் விசாரணை நடத்தியபோது, வாகனத்தை ஓட்டியவர் சந்தேகத்திற்கிடமான வகையில் நடந்துகொண்டதால், மேலதிக சோதனை மேற்கொள்ளப்பட்டதாக அவர் தெரிவித்தார்.
அப்போது, மூன்று பெட்டிகள், ஒரு காகிதப் பை மற்றும் ஒரு கருப்பு நிற முதுகுப்பை ஆகியவற்றில் ரொக்கப் பணம் மறைத்து வைக்கப்பட்டிருந்தது கண்டுபிடிக்கப்பட்டது.
இதையடுத்து, அந்தத் தம்பதியினர் கைது செய்யப்பட்டதுடன், ரொக்கப் பணமும் சம்பந்தப்பட்ட வாகனமும் பறிமுதல் செய்யப்பட்டன. பின்னர், மேலதிக நடவடிக்கைக்காக அவை அனைத்தும் மலேசிய அரச சுங்கத் துறையிடம் (JKDM) ஒப்படைக்கப்பட்டன.
இந்த வழக்கு, 1967ஆம் ஆண்டு சுங்கச் சட்டம் மற்றும் 2019ஆம் ஆண்டு சுங்க விதிமுறைகளின் விதி 55(1)(B) உள்ளிட்ட சட்டப் பிரிவுகளின் கீழ் விசாரிக்கப்படுகிறது.
நாட்டிற்குள் கொண்டு வரப்படும் அல்லது நாட்டிலிருந்து வெளியே எடுத்துச் செல்லப்படும் ரொக்கப் பணத்தை உரிய முறையில் அறிவிக்கத் தவறுவது சட்டவிரோதமான குற்றமாகும் என்றும், அவ்வாறு செய்பவர்கள் மீது சட்டப்படி நடவடிக்கை எடுக்கப்படும் என்றும் AKPS வலியுறுத்தியுள்ளது.
