அக்டோபர் 28 – மலேசியாவின் ஜொகூர் மாநிலத்தில் உள்ள டெசாரு கோஸ்ட் பகுதியில் நடைபெறும் உலக அமெச்சூர் கோல்ஃப் சாம்பியன்ஷிப் (WAGC) 2026 உலக இறுதிப் போட்டியில், 48 நாடுகளைச் சேர்ந்த 620 கோல்ஃப் வீரர்கள் மற்றும் பிரதிநிதிகள் பங்கேற்றுள்ளனர்.
31ஆவது பதிப்பாக நடைபெறும் இப்போட்டி அக்டோபர் 30ஆம் தேதி வரை நடைபெறவுள்ளது. சர்வதேசத் தரத்திலான கோல்ஃப் மைதான வசதிகள் மற்றும் பல்வேறு சுற்றுலா அம்சங்கள் மூலம் மலேசியாவின் விளையாட்டுச் சுற்றுலாத் துறையை மேலும் வலுப்படுத்துவதற்கான முக்கிய தளமாக இப்போட்டி அமைந்துள்ளது.
ஜொகூர் மாநில ஒற்றுமை, பாரம்பரியம் மற்றும் கலாசாரக் குழுவின் தலைவர் பன்னீர் செல்வம் கூறுகையில், விளையாட்டு என்பது சர்வதேச மக்களை ஒன்றிணைக்கும் சக்தியாக இருப்பதுடன், உள்ளூர் மக்களுக்கு பொருளாதார வாய்ப்புகளை உருவாக்கும் ஆற்றலையும் கொண்டுள்ளது என்றார்.
சர்வதேச அளவிலான நிகழ்வுகள் போட்டிகளுடன் மட்டும் நின்றுவிடாமல், தங்குமிட வசதிகள், உணவு மற்றும் பானத் தொழில்கள், போக்குவரத்து மற்றும் சுற்றுலாச் சேவைகள் உள்ளிட்ட பல்வேறு துறைகளிலும் வணிக நடவடிக்கைகளை ஊக்குவிக்க வேண்டும் என்றும் அவர் வலியுறுத்தினார்.
“வெற்றிகரமான நிகழ்வு என்பது ஜொகூருக்கு சுற்றுலாப் பயணிகளை அழைத்து வருவதுடன் மட்டும் நின்றுவிடக் கூடாது; அது ஜொகூர் மக்களுக்கும் வாய்ப்புகளை உருவாக்க வேண்டும்,” என்றார் அவர்.
இதற்கிடையில், ஜொகூர் கோல்ஃப் சுற்றுலா சங்கத்தின் (JGTA) தலைவர் கர்னல் முகமட் ஜமால் சாலே, இப்போட்டியானது கோல்ஃப் விளையாட்டு, விருந்தோம்பல் மற்றும் சுற்றுலாத் துறைகளில் மலேசியாவின் திறன்களைச் சர்வதேசப் பார்வையாளர்களுக்கு அறிமுகப்படுத்துவதற்கான சிறந்த வாய்ப்பாக அமைந்துள்ளதாகத் தெரிவித்தார்.
இப்போட்டிகள் மூன்று முக்கிய கோல்ஃப் மைதானங்களில் நடைபெறுகின்றன. அவை The Els Club Desaru Coast, Forest City Golf Resort மற்றும் Tanjong Puteri Golf Resort ஆகியவையாகும்.
மலேசியாவுக்கு வருகை தரும் ஆண்டான 2026 மற்றும் ஜொகூருக்கு வருகை தரும் ஆண்டான 2026 ஆகியவற்றுடன் இணைந்து நடத்தப்படும் இந்நிகழ்வு, பங்கேற்பாளர்கள் மலேசியாவின் சுற்றுலாத் தலங்கள், பாரம்பரிய உணவு வகைகள் மற்றும் கலாசார மரபுகளை அறிந்துகொள்ளவும் வாய்ப்பளிக்கிறது.
சர்வதேசப் பங்கேற்பாளர்களின் வருகை, அவர்கள் நாட்டில் தங்கும் காலத்தை நீட்டிப்பதுடன் சுற்றுலாச் செலவினங்களையும் அதிகரிக்கும் என ஏற்பாட்டாளர்கள் நம்பிக்கை தெரிவித்துள்ளனர். இதன் மூலம் சுற்றுலாத் துறை மற்றும் உள்ளூர் வணிகங்களுக்கு பொருளாதாரப் பலன்கள் கிடைக்கும் என எதிர்பார்க்கப்படுகிறது.
