பினாங்கு, நவம்பர் 2: பினாங்கு மாநிலத்தின் மூன்றாவது இணைப்புத் திட்டத்தை (Penang Third Link) செயல்படுத்துவதற்கான சாத்தியக்கூறுகளை மாநில அரசு மறுஆய்வு செய்து வருகிறது. முன்னதாக முன்மொழியப்பட்ட கடலுக்கடியில் சுரங்கப்பாதை அமைக்கும் திட்டத்திற்குப் பதிலாக, தற்போது பாலம் அமைக்கும் திட்டம் மாற்று வழியாகப் பரிசீலிக்கப்பட்டு வருகிறது.
பினாங்கு மாநில உள்கட்டமைப்பு, போக்குவரத்து மற்றும் இலக்கவியல் குழுத் தலைவர் ஜைரில் கீர் ஜொஹாரி இதனைத் தெரிவித்தார்.
முன்னதாக மேற்கொள்ளப்பட்ட சாத்தியக்கூறு ஆய்வின் முடிவுகளைத் தொடர்ந்து, பாலம் அமைக்கும் திட்டத்தை அடிப்படையாகக் கொண்ட புதிய வழித்தட ஆய்வுக்கு மாநில அரசு ஒப்புதல் அளித்துள்ளதாக அவர் கூறினார்.
இந்தப் புதிய வழித்தடம் வடக்கு நோக்கி மாற்றியமைக்கப்படவுள்ளது. இதன் மூலம் பினாங்கு துறைமுகத்தின் எதிர்கால விரிவாக்கத் திட்டங்களுக்கு இடையூறு ஏற்படாமல் இருப்பதுடன், துறைமுகத்தின் செயல்பாடுகள் மற்றும் கப்பல்களின் போக்குவரத்துப் பாதைகளும் பாதிக்கப்படாமல் இருப்பது உறுதி செய்யப்படும்.
மேலும், குர்னி பே (Gurney Bay) மற்றும் அதன் சுற்றுப்புறப் பகுதிகளில் நிலவும் போக்குவரத்து நெரிசலைக் குறைப்பதும் இந்தப் புதிய வழித்தட மாற்றத்தின் மற்றொரு நோக்கமாகும்.
தற்போது இந்தத் திட்டத்திற்கான கருத்தியல் வடிவமைப்பு ஆய்வு நடைபெற்று வருவதாக ஜைரில் தெரிவித்தார். ஆய்வின் முடிவுகள் பினாங்கு துறைமுக ஆணையத்திடம் (PPC) சமர்ப்பிக்கப்பட்டு, அதன் கருத்துகளும் மேலதிக பரிசீலனைகளும் பெறப்படும் என்றார்.
இந்த மதிப்பீட்டில் தொழில்நுட்பச் சாத்தியக்கூறுகள், நிதி விளைவுகள், போக்குவரத்துத் தேவைகள், கடல்சார் பாதுகாப்பு மற்றும் நீண்டகாலப் பொருளாதாரப் பலன்கள் உள்ளிட்ட பல்வேறு அம்சங்கள் ஆராயப்படும்.
LRT பாலத்திலிருந்து மூன்றாவது இணைப்புத் திட்டம் வேறுபட்டது
பினாங்கு மூன்றாவது இணைப்புத் திட்டம், பினாங்குத் தீவையும் பெருநிலப் பகுதியையும் இணைக்கும் வகையில் முன்மொழியப்பட்டுள்ள இலகு ரயில் போக்குவரத்துத் திட்டத்தின் (LRT) பாலத்திலிருந்து முற்றிலும் மாறுபட்ட நோக்கத்தைக் கொண்டிருப்பதாக ஜைரில் விளக்கினார்.
LRT பாலம், பினாங்குத் தீவையும் பெருநிலப் பகுதியில் உள்ள பினாங்கு சென்ட்ரலையும் நேரடியாக ரயில் வழியாக இணைக்கும். இருப்பினும், அந்தப் பாலம் ரயில் சேவைகளுக்காக மட்டுமே பயன்படுத்தப்படும் என்பதால், சாலை வாகனங்கள் அதில் பயணிக்க முடியாது.
இதற்கிடையில், மூன்றாவது இணைப்புப் பாலத்தில் பாதசாரிகளுக்கான நடைபாதைகளையும் தனியான மிதிவண்டிப் பாதைகளையும் அமைக்க வேண்டும் என்று மாநில அரசு கோரிக்கை விடுத்துள்ளது.
திட்டத்திற்கான ஒப்பந்தம் வழங்கப்பட்ட பின்னர், வடிவமைப்புப் பணிகளின்போது இவ்வசதிகள் குறித்தும் பரிசீலிக்கப்படும். அடுத்த சில மாதங்களில் திட்ட ஒப்பந்தம் வழங்கப்படும் என எதிர்பார்க்கப்படுகிறது.
முதல் பாலத்தின் போக்குவரத்து நெரிசலைக் குறைக்க புதிய இணைப்பு அவசியம்
பினாங்கு LRT பாலம் மட்டுமே தற்போதைய முதல் பாலத்தில் (Penang First Bridge) அதிகரித்து வரும் போக்குவரத்து நெரிசலைச் சமாளிக்கப் போதுமானதாக இருக்காது என்றும் ஜைரில் வலியுறுத்தினார்.
குறிப்பாக, வடக்கு செபராங் பிறையில் (North Seberang Perai) வேகமாக அதிகரித்து வரும் வளர்ச்சியின் காரணமாக, அப்பகுதியில் போக்குவரத்துத் தேவை மேலும் அதிகரிக்கும் என எதிர்பார்க்கப்படுகிறது.
இதனால் ஏற்கெனவே உள்ள சாலை உள்கட்டமைப்புகளின் மீதான அழுத்தமும் அதிகரிக்கும்.
எனவே, எதிர்காலப் போக்குவரத்துத் தேவைகளைச் சமாளிப்பதற்கும், பினாங்குத் தீவுக்கும் பெருநிலப் பகுதிக்கும் இடையிலான போக்குவரத்து இணைப்பை மேம்படுத்துவதற்கும் கூடுதலான சாலை இணைப்பு அவசியம் என்று அவர் தெரிவித்தார்.