சியாங் மாய், நவம்பர் 3: தாய்லாந்தின் சியாங் மாய் மாகாணம், டோய் லோ மாவட்டத்தில் அமைந்துள்ள வாட் மாய் நோங் ஹோய் ஆலயத்தின் பகோடா கோபுரத்தின் மேற்பகுதி செவ்வாய்க்கிழமை (நவம்பர் 3) காலை திடீரென இடிந்து விழுந்தது.
இந்தச் சம்பவத்தில் யாருக்கும் காயம் ஏற்படவில்லை. இருப்பினும், கட்டடத்தின் எஞ்சிய பகுதிகளும் இடிந்து விழக்கூடும் என்ற அச்சம் காரணமாக, முன்னெச்சரிக்கை நடவடிக்கையாக உள்ளூர் அதிகாரிகள் சம்பவ இடத்தைச் சுற்றி பாதுகாப்பு வேலிகளை அமைத்து பொதுமக்கள் நுழையத் தடை விதித்துள்ளனர்.
குருங்தெப் துரகிஜ் செய்தி நிறுவனத்தின் செய்தியாளர் பன்யாலக் ஸ்ரீபுரின் வெளியிட்ட தகவலின்படி, நவம்பர் 3ஆம் தேதி காலை 9.30 மணியளவில் இந்தக் கட்டட இடிவு தொடர்பாக உள்ளூர் புத்த மத நிர்வாக அதிகாரிகள் அவசர அறிவிப்பை வெளியிட்டனர்.
டோய் லோ மாவட்டத்தின் சாந்திசுக் துணை மாவட்டத்தில் அமைந்துள்ள இந்தப் பகோடாவின் மேற்பகுதி முற்றிலும் சேதமடைந்துள்ளது. இதனால் செங்கற்கள், சாந்து மற்றும் கான்கிரீட் துண்டுகள் ஆலயத்தின் சுற்றுப்புறத் திறந்தவெளிப் பகுதியில் சிதறிக் கிடக்கின்றன.
இதற்கிடையில், பகோடா இடிந்து விழும் தருணத்தைப் பதிவு செய்த காணொளியும் வெளியாகியுள்ளது.
அந்தக் காணொளியில், முதலில் பலத்த விரிசல் ஏற்படும் சத்தம் ஆலய வளாகம் முழுவதும் எதிரொலிப்பதும், பின்னர் கோபுரத்தின் உச்சிப்பகுதி படிப்படியாகச் சரிந்து கீழே விழுவதும் பதிவாகியுள்ளது.
இந்தச் சம்பவத்தைத் தொடர்ந்து, ஏழாவது வட்டார புத்த மத நிர்வாக அலுவலகம், உள்ளூர் நிர்வாக அதிகாரிகள் மற்றும் அவசரகால மீட்புப் பணியாளர்களுடன் இணைந்து சம்பவ இடத்தை உடனடியாகச் சுற்றிவளைத்து பாதுகாப்புப் பணிகளை மேற்கொண்டது.
தற்போது பொறியாளர்கள் மற்றும் கட்டட நிபுணர்கள் இடிபாடுகளின் கீழ் எஞ்சியுள்ள பகோடாவின் அடிப்பகுதியை ஆய்வு செய்து வருகின்றனர்.
கட்டடத்திற்கு ஏற்பட்டுள்ள சேதத்தின் அளவை மதிப்பிடுவதுடன், திடீரென இடிந்து விழுந்ததற்கான உண்மையான காரணத்தைக் கண்டறியும் பணிகளும் நடைபெற்று வருகின்றன.