சியோல், நவம்பர் 4 : தென்கொரியாவில் சளி மருந்துகளைப் பயன்படுத்தி மெத்தாம்பெட்டமைன் எனப்படும் போதைப்பொருளைத் தயாரித்ததாகச் சந்தேகிக்கப்படும் 13 பேரை அந்நாட்டு காவல்துறையினர் கைது செய்துள்ளனர்.
கியோங்கி மாகாணத்தின் பியோங்டேக் பகுதியில் உள்ள குடியிருப்புப் பகுதியில் இந்தச் சட்டவிரோத நடவடிக்கை இடம்பெற்றுள்ளது. இதில் மருந்தக ஊழியர்கள் சிலரும் போதைப்பொருள் தயாரிப்புக் குழுவுக்கு மருந்துகளை வழங்கியதாகக் குற்றஞ்சாட்டப்பட்டுள்ளனர்.
சியோல் பெருநகரக் காவல்துறை நவம்பர் 3ஆம் தேதி வெளியிட்ட தகவலின்படி, கைது செய்யப்பட்டவர்களில் நால்வர் மீது வழக்குத் தொடர்வதற்காக அரசுத் தரப்பு வழக்கறிஞர்களிடம் ஒப்படைக்கப்பட்டுள்ளனர். அவர்கள் தொடர்ந்து காவலில் வைக்கப்பட்டுள்ளனர்.
போதைப்பொருள் கட்டுப்பாட்டுச் சட்டம் மற்றும் மருந்துப் பொருள் தொடர்பான சட்டங்களை மீறியதாகச் சந்தேக நபர்கள் மீது குற்றச்சாட்டுகள் முன்வைக்கப்பட்டுள்ளன.
இந்தக் குழுவின் தலைவரையும் உள்ளடக்கிய ஐந்து பேர், 2025ஆம் ஆண்டு ஏப்ரல் முதல் 2026ஆம் ஆண்டு ஜூன் வரை மொத்தம் 1.36 கிலோகிராம் மெத்தாம்பெட்டமைன் போதைப்பொருளைத் தயாரித்ததாகக் குற்றஞ்சாட்டப்பட்டுள்ளனர்.
கைப்பற்றப்பட்ட போதைப்பொருளின் மதிப்பு சுமார் 420 கோடி தென்கொரிய வோன் (சுமார் 40 லட்சம் சிங்கப்பூர் வெள்ளி) எனக் காவல்துறையினர் மதிப்பிட்டுள்ளனர்.
இந்த அளவிலான போதைப்பொருள் சுமார் 40,000 முறை பயன்படுத்துவதற்குப் போதுமானது என்றும், ஒவ்வொரு முறையும் சுமார் ஒரு லட்சம் வோன் மதிப்புடையது என்றும் அதிகாரிகள் தெரிவித்தனர்.
சொத்துத் தகராறு காரணமாக ஆளில்லாமல் இருந்த அடுக்குமாடிக் குடியிருப்பைச் சந்தேக நபர்கள் தங்களது சட்டவிரோத நடவடிக்கைக்குப் பயன்படுத்தியுள்ளனர்.
வெளிநாட்டு ஆய்வுக் கட்டுரைகள், அறிவியல் பரிசோதனை காணொளிகள் மற்றும் இதுபோன்ற வழக்குகள் தொடர்பான நீதிமன்றத் தீர்ப்புகள் மூலம் போதைப்பொருள் தயாரிப்பது குறித்து அவர்கள் அறிந்துகொண்டதாகக் காவல்துறையினர் தெரிவித்தனர்.
இதற்கிடையில், உரிமம் பெற்ற மூலிகை மருந்தாளரும் அடங்கிய மேலும் ஆறு பேர், மெத்தாம்பெட்டமைன் தயாரிப்பதற்காகப் பயன்படுத்தப்படும் என்பது தெரிந்தும், அந்தக் குழுவுக்கு மொத்தம் 6,36,600 சளி மருந்து மாத்திரைகளை வழங்கியதாகக் குற்றஞ்சாட்டப்பட்டுள்ளனர்.
இந்த மருந்துகள் குடியிருப்புப் பகுதிகளில் உள்ள வாகன நிறுத்துமிடங்கள் மற்றும் பிற இடங்களில் கைமாற்றப்பட்டதாக அதிகாரிகள் தெரிவித்தனர்.
மேலும், உரிய உரிமம் இன்றி அதிக அளவிலான சளி மருந்துகளை விற்பனை செய்ததாகச் சந்தேகிக்கப்படும் மருந்தக மேலாளர் ஒருவரும், அபாயகரமான இரசாயனப் பொருட்களை விநியோகித்த ஒருவரும் கைது செய்யப்பட்டுள்ளனர்.
இந்த நடவடிக்கையின்போது மொத்தம் 1.36 கிலோகிராம் மெத்தாம்பெட்டமைன் போதைப்பொருள், அதைத் தயாரிக்கப் பயன்படுத்தப்பட்ட உபகரணங்கள் மற்றும் சில சளி மருந்துகளில் காணப்படும் சூடோஎபெட்ரின் (Pseudoephedrine) என்ற மூலப்பொருளின் 635 கிராம் அளவு ஆகியவற்றைக் காவல்துறையினர் கைப்பற்றினர்.
மேலும், சட்டவிரோத நடவடிக்கைகள் மூலம் கிடைத்ததாகக் கருதப்படும் 13 கோடி தென்கொரிய வோன் பணமும் பறிமுதல் செய்யப்பட்டது.
இந்தச் சம்பவம் தொடர்பாகத் தொடர்ந்து விசாரணைகள் முன்னெடுக்கப்பட்டு வருவதாகக் காவல்துறையினர் தெரிவித்தனர்.