நவம்பர் 5: வெள்ளம் காரணமாக மாணவியை அழைத்துச் செல்ல வந்த வேன் பாதியிலேயே சிக்கிக்கொண்டதால், அந்த மாணவி பாதுகாப்பாக வீடு திரும்பும் வரை இரவு 7.50 மணி வரை பள்ளியில் காத்திருந்து உடனிருந்து கவனித்த ஆசிரியை ஒருவருக்கு சமூக வலைத்தளங்களில் பாராட்டுகள் குவிந்து வருகின்றன.
Threads சமூக ஊடகத்தில் @asheqen24 என்ற பயனர் பகிர்ந்த புகைப்படமும் பதிவும் இணையத்தில் பலரது கவனத்தை ஈர்த்துள்ளன.
அந்தப் புகைப்படத்தில், இரவு நேரமாகியிருந்தபோதும் பள்ளி வளாகத்திற்கு வெளியே ஒரு மாணவி அமைதியாக அமர்ந்திருப்பதைக் காண முடிந்தது.
இதுகுறித்து அந்த ஆசிரியை தனது பதிவில் கூறியதாவது:
“இறைவனுக்கு நன்றி. இன்று மாலை 7.50 மணியளவில் பள்ளி வளாகத்திலிருந்து கடைசி மாணவியும் பாதுகாப்பாக வீட்டுக்குச் செல்வதற்கான ஏற்பாடுகளை முடித்துவிட்டோம்.
“சிலர் தவறாகப் புரிந்துகொண்டதால் ஒரு விளக்கத்தை அளிக்க விரும்புகிறேன். இந்த மாணவி தாமதமாக வீட்டுக்குச் சென்றதற்குக் காரணம், அவரை அழைத்துச் செல்ல வந்த வேன் வெள்ளத்தில் சிக்கிக்கொண்டதுதான்.
“தயவுசெய்து அனைவரும் நல்லெண்ணத்துடன் இந்தச் சூழ்நிலையைப் புரிந்துகொள்ளுங்கள். இந்த விவகாரத்தில் பெற்றோர் அல்லது பாதுகாவலர்கள் உட்பட யாரையும் குறை கூற வேண்டாம்.
“பெற்றோரைக் குற்றம் சாட்டுவதற்காக நான் இந்தப் பதிவை வெளியிடவில்லை. மாறாக, ஆசிரியர்களின் கடமையையும் அவர்கள் செய்யும் தியாகங்களையும் வெளிப்படுத்தவே இதைப் பகிர்ந்தேன். பலரும் ஆசிரியர் பணியை எளிதான தொழிலாகக் கருதுகின்றனர். ஆனால், உண்மையில் இந்தப் பணியில் பல்வேறு தியாகங்கள் அடங்கியுள்ளன,” என அவர் குறிப்பிட்டிருந்தார்.
மாலை 6.50 மணி முதல் ஒரு மணி நேரக் காத்திருப்பு
இந்தச் சம்பவம் குறித்து WORLD OF BUZZ செய்தி நிறுவனத்திடம் பேசிய அந்த ஆசிரியை, அன்று மாலை 6.50 மணி முதல் 7.50 மணி வரை மாணவியுடன் பள்ளியில் காத்திருந்ததாகத் தெரிவித்தார்.
வெள்ளம் காரணமாக சில சாலைகளில் போக்குவரத்து தடைப்பட்டிருந்ததை ஆசிரியர்களும் பாதுகாவலரும் ஏற்கெனவே மாணவியிடம் தெரிவித்திருந்தனர்.
“நல்லவேளையாக, மாணவி நிலைமையை நன்றாகப் புரிந்துகொண்டு அமைதியாக இருந்தார்.
“நாங்கள் அவருடைய தாயாரையும் தொடர்புகொண்டு நிலைமையை விளக்கினோம். வழக்கமாக அவரை அழைத்துச் செல்லும் வேன் வர முடியாவிட்டால், மாற்றுப் போக்குவரத்து ஏற்பாடு செய்வோம் என்றும் தெரிவித்தோம்,” என்றார்.
சமூக வலைத்தளங்களில் எழுந்த சில தவறான புரிதல்களுக்குப் பதிலளித்த அவர், மாணவி தாமதமாகச் சென்றதற்கு முழுமையாக வானிலை மற்றும் வெள்ள நிலைமைகளே காரணம் என்றும், பெற்றோரையோ போக்குவரத்து சேவை வழங்குநர்களையோ குறை கூற வேண்டிய அவசியமில்லை என்றும் வலியுறுத்தினார்.
“மாணவர்களுக்கு நாங்கள் இரண்டாவது குடும்பம்”
இந்தச் சம்பவத்தின்போது தாம் மட்டும் மாணவியுடன் இருக்கவில்லை என்றும், பிற்பகல் நேர உதவி முதல்வர், பள்ளிப் பாதுகாவலர் மற்றும் இன்னும் வீடு திரும்பாத சில ஆசிரியர்களும் மாணவியின் பாதுகாப்பைக் கருத்தில் கொண்டு உடனிருந்ததாகவும் அவர் தெரிவித்தார்.
ஆசிரியர் பணியின் உண்மையான பொறுப்புகள் குறித்து அவர் மேலும் கூறுகையில்:
“பலரும் பள்ளி மணி அடித்தவுடன் ஆசிரியர்களின் வேலை முடிந்துவிடுவதாக நினைக்கிறார்கள். ஆனால், ஆசிரியர்களின் பொறுப்பு வகுப்பறையுடன் முடிவதில்லை.
“சில நேரங்களில் நாங்கள் மாணவர்களுக்கு இரண்டாவது குடும்பமாக மாறுகிறோம். அவர்களின் பாதுகாப்பைப் பார்த்துக்கொள்கிறோம், நலனில் அக்கறை செலுத்துகிறோம், அவர்களின் பிரச்சினைகளுக்குச் செவிசாய்க்கிறோம். பள்ளி நேரம் முடிந்த பின்னரும் அவர்கள் நலமாக இருக்கிறார்களா என்பதை உறுதிப்படுத்துகிறோம்.
“ஆசிரியர்கள் ஒவ்வொரு நாளும் செய்யும் பல சிறிய தியாகங்கள் மற்றவர்களின் கவனத்திற்குச் செல்வதில்லை. அவற்றைப் பற்றி நாங்கள் எப்போதும் பேசுவதில்லை. ஆனால், மாணவர்கள் மீது உண்மையான அக்கறை இருப்பதால்தான் அவற்றைச் செய்கிறோம்.
“இறுதியில், ஆசிரியர் பணி என்பது பாடங்களைக் கற்பிப்பது மட்டுமல்ல. மாணவர்களின் வாழ்க்கையைச் செதுக்குவதும், எந்தவொரு மாணவரும் தனித்து விடப்பட்டதாக உணராமல் பார்த்துக்கொள்வதும்தான்,” என அவர் WORLD OF BUZZ செய்தி நிறுவனத்திடம் தெரிவித்தார்.
இந்தச் சம்பவத்தில் ஆசிரியரின் அர்ப்பணிப்பைப் பாராட்டி ஆதரவு தெரிவித்த சமூக ஊடகப் பயனர்களுக்கும் அவர் தனது நன்றியைத் தெரிவித்துக்கொண்டார்.
ஒரு மாணவியின் பாதுகாப்புக்காகப் பள்ளி நேரம் முடிந்த பின்னரும் பொறுப்புணர்வுடன் காத்திருந்த ஆசிரியையின் செயல், ஆசிரியர் பணியின் அர்ப்பணிப்பையும் மனிதநேயத்தையும் மீண்டும் எடுத்துக்காட்டுவதாகப் பலரும் பாராட்டி வருகின்றனர்.