கூச்சிங், அக். 31: கூச்சிங்கில் அமைந்துள்ள வரலாற்றுச் சிறப்புமிக்க ஸ்ரீ மகா மாரியம்மன் ஆலயத்திற்கு அருகிலுள்ள இயற்கைப் பாறையை அழகிய பூங்காவாக மேம்படுத்தும் திட்டம் முன்மொழியப்பட்டுள்ளது.
இந்தத் திட்டத்தின் மூலம் ஆலயத்திற்கு தனித்துவமான அடையாளத்தை உருவாக்குவதுடன், சரவாக்கின் மத நல்லிணக்கத்தையும் வெளிப்படுத்த முடியும் என்று சரவாக் துணை முதல்வர் டத்தோ அமர் டாக்டர் சிம் குய் ஹியான் தெரிவித்துள்ளார்.
ராக் சாலையில், மழைநீர் கால்வாய்க்கு அருகில் அமைந்துள்ள இந்தப் பாறையை அழகுபடுத்தும் திட்டம், நீர்ப்பாசன மற்றும் வடிகால் துறையுடன் (DID) இணைந்து மீண்டும் பரிசீலிக்கப்படும் என்று அவர் கூறினார்.
இந்த இயற்கைப் பாறை இன்னும் வளர்ந்து வருவதாகத் தாம் அறிந்துள்ளதாகக் குறிப்பிட்ட அவர், அதை ஆலய வளாகத்துடன் இணைத்து அழகிய தோட்டமாக மாற்ற முடியும் என்றார்.
“இது இன்னும் பயன்படுத்தப்படாத ஒரு பொக்கிஷம். இப்போது மக்கள் இதைப் பாறையாக மட்டுமே பார்க்கிறார்கள். ஆனால், முறையாக அழகுபடுத்தி ஆலயத்துடன் இணைத்தால் இது தனித்துவமான இடமாக மாறும்,” என்று அவர் தெரிவித்தார்.
வெள்ளிக்கிழமை ஆலயத்தில் நடைபெற்ற புனருதாரண அஷ்டபந்தன மகா கும்பாபிஷேக நிகழ்ச்சியில் கலந்துகொண்ட பின்னர் செய்தியாளர்களிடம் அவர் இதனைத் தெரிவித்தார்.
இந்தத் திட்டத்தைச் செயல்படுத்த இயற்கை வடிவமைப்பு நிபுணர்கள், வரலாற்று ஆய்வாளர்கள் மற்றும் சமூக உறுப்பினர்களின் ஒத்துழைப்பு தேவைப்படும் என்றும், இதற்காக இதர மதங்களுக்கான பிரிவு (Unifor) மூலம் நிதியுதவி பெறுவதற்கான வாய்ப்பும் உள்ளதாகவும் அவர் கூறினார்.
இந்த முயற்சி இந்து சமூகத்திற்கு மட்டுமல்லாமல், அனைத்து சரவாக்கியர்களும் பெருமைப்படக்கூடிய ஒன்றாக அமைய வேண்டும் என்றும் அவர் வலியுறுத்தினார்.
மேலும், ஸ்ரீ மகா மாரியம்மன் ஆலயம் வெறும் வழிபாட்டுத் தலம் மட்டுமல்ல; சரவாக்கில் வாழும் இந்துக்களின் கலாசாரப் பாரம்பரியத்தின் முக்கிய அங்கமாகவும், இன, மத வேறுபாடின்றி மக்கள் ஒன்றிணையும் சமூக மையமாகவும் விளங்குகிறது என்று டாக்டர் சிம் குறிப்பிட்டார்.
இந்தப் பாறையைச் சுற்றி உருவாக்கப்படும் தோட்டம், ஆலயத்திற்கு வரும் பக்தர்கள் மற்றும் சுற்றுலாப் பயணிகள் இயற்கை அழகை ரசிக்கும் இடமாக அமையும் என எதிர்பார்க்கப்படுகிறது.
இந்நிகழ்ச்சியில் ஸ்ரீ மகா மாரியம்மன் ஆலயச் சங்கத் தலைவர் டத்தோ ஷங்கர் ராம் அஸ்னானி, Unifor இயக்குநர் டத்தோ ஜார்ஜினா அப்பியா ந்காவ், கூச்சிங் தெற்கு மாநகர மேயர் டத்தோ வீ ஹோங் செங் உள்ளிட்டோரும் கலந்துகொண்டனர்.