ஆயர் கெரோ, அக்டோபர் 31 : மலாக்காவின் 16ஆவது மாநிலத் தேர்தலில் பல்வேறு கட்சிகளைச் சேர்ந்த மொத்தம் 79 வேட்பாளர்கள் போட்டியிடுவது உறுதி செய்யப்பட்டுள்ளது. வேட்புமனுக்கள் எதுவும் நிராகரிக்கப்படவில்லை.
தேர்தல் ஆணையத் தலைவர் டத்தோ ஸ்ரீ ரம்லான் டத்தோ ஹருன் இதனைத் தெரிவித்தார்.
கட்சி வாரியாக, பக்காத்தான் ஹராப்பான் (PH) சார்பில் 24 பேரும், பாரிசான் நேஷனல் (BN) சார்பில் 23 பேரும், பார்ட்டி பெர்சாமா சார்பில் 16 பேரும், பெர்சத்து சார்பில் 7 பேரும், பெரிக்காத்தான் நேஷனல் (PN) சார்பில் 5 பேரும், பார்ட்டி பூமிபுத்ரா பெர்காசா சார்பில் ஒருவரும் போட்டியிடுகின்றனர். மேலும், சுயேச்சையாக மூவர் களமிறங்குகின்றனர்.
மொத்தமுள்ள 28 தொகுதிகளில், 11 தொகுதிகளில் நேரடிப் போட்டியும், மற்றொரு 11 தொகுதிகளில் மும்முனைப் போட்டியும் நடைபெறவுள்ளன. ஆறு தொகுதிகளில் நான்கு முனைப் போட்டி நிலவுகிறது.
தேர்தல் அதிகாரி போட்டியிடும் தொகுதிகளுக்கான தேர்தலை அதிகாரப்பூர்வமாக அறிவித்ததைத் தொடர்ந்து, நவம்பர் 13ஆம் தேதி வரை பிரசாரம் நடைபெறும் என ரம்லான் தெரிவித்தார்.
மேலும், தேர்தல் பிரசார நடவடிக்கைகளைக் கண்காணிக்கவும், விதிமீறல்களைத் தடுக்கவும் தேர்தல் ஆணையம் 28 தேர்தல் பிரசார அமலாக்கக் குழுக்களை அமைத்துள்ளதாகவும் அவர் கூறினார்.
