சுங்கை சிப்புட்: 2026ஆம் ஆண்டு தீபாவளிப் பண்டிகையை முன்னிட்டு, இந்து மதத்தைச் சேர்ந்த அரசுப் பணியாளர்களுக்கான குழு அடிப்படையிலான பதிவற்ற விடுமுறை (Cuti Tanpa Rekod – CTR Kelompok) நடைமுறையில் சிறப்புத் தளர்வு வழங்க வேண்டும் என ஜபாத்தான் பெர்கிட்மத்தான் அவாம் (JPA) மற்றும் மத்திய அரசிடம் கோரிக்கை விடுக்கப்பட்டுள்ளது.
இது தொடர்பாக அறிக்கை வெளியிட்டுள்ள மக்கள் நீதிக் கட்சியின் (Parti KEADILAN Rakyat) சுங்கை சிப்புட் கிளைத் தலைவர் நோவிந்தன் கிருஷ்ணன், இவ்வாண்டு தீபாவளி நவம்பர் 8ஆம் தேதி ஞாயிற்றுக்கிழமை வருவதையும், சம்பந்தப்பட்ட மாநிலங்களில் நவம்பர் 9ஆம் தேதி திங்கட்கிழமை மாற்று பொது விடுமுறையாக அறிவிக்கப்பட்டுள்ளதையும் சுட்டிக்காட்டினார்.
தற்போதைய நடைமுறையின்படி, தீபாவளியைப் பொது விடுமுறையாகக் கொண்ட மாநிலங்களில் பணியாற்றும் இந்து அரசுப் பணியாளர்கள், நிர்ணயிக்கப்பட்ட நிபந்தனைகளுக்கு உட்பட்டு, பண்டிகைக்கு முந்தைய நாள் அல்லது பண்டிகையின் இரண்டாம் நாளில் CTR விடுமுறைக்கு விண்ணப்பிக்கலாம்.
இருப்பினும், இவ்வாண்டு இந்தத் தேதிகள் பெரும்பாலான அரசுப் பணியாளர்களுக்கு வேலை இல்லாத நாட்களுடன் ஒத்துப்போவதால், இந்த விடுமுறை வசதியை முழுமையாகப் பயன்படுத்துவதில் சிக்கல் ஏற்படக்கூடும் என அவர் தெரிவித்தார்.
தீபாவளி என்பது ஒரு பொது விடுமுறை மட்டுமல்ல. அது சமய வழிபாடுகள், குடும்பத் தயாரிப்புகள், சொந்த ஊர்களுக்குப் பயணம் மேற்கொள்வது மற்றும் பாரம்பரியக் கடமைகளை நிறைவேற்றுவது ஆகியவற்றுடன் தொடர்புடைய முக்கியமான பண்டிகையாகும் என்றும் அவர் குறிப்பிட்டார்.
இதனைக் கருத்தில் கொண்டு, 2026ஆம் ஆண்டுக்கான தீபாவளி CTR விடுமுறையால் பாதிக்கப்படும் இந்து அரசுப் பணியாளர்களுக்குச் சிறப்புத் தளர்வு வழங்குவது குறித்து JPA ஆராய வேண்டும் என அவர் வலியுறுத்தினார்.
மேலும், துறைத் தலைவர்களின் ஒப்புதல் மற்றும் பொதுச் சேவையின் தேவைகளுக்கு உட்பட்டு, அருகிலுள்ள வேலை நாளில் CTR விடுமுறையைப் பயன்படுத்த அனுமதிப்பது குறித்தும் பரிசீலிக்க வேண்டும் என அவர் முன்மொழிந்தார்.
அத்துடன், எதிர்காலத்தில் பண்டிகைகள் வார இறுதி அல்லது மாற்றுப் பொது விடுமுறை நாட்களில் வரும்போது, CTR விடுமுறையின் பயன் பாதிக்கப்படாத வகையில் தற்போதைய நடைமுறைகளை மறுஆய்வு செய்ய வேண்டும் என்றும் அவர் கேட்டுக்கொண்டார்.
இந்தக் கோரிக்கை கூடுதல் சலுகைகளைப் பெறுவதற்கான முயற்சி அல்ல என்றும், பண்டிகைக் கால விடுமுறை வசதியின் அடிப்படை நோக்கத்தைச் சிறப்பாக நிறைவேற்றுவதே இதன் நோக்கம் என்றும் நோவிந்தன் கிருஷ்ணன் தெரிவித்தார்.
மதம், கலாசாரம் மற்றும் அரசுப் பணியாளர்களின் குடும்ப நலன் ஆகியவற்றுக்கு முக்கியத்துவம் அளிக்கும் இத்தகைய அணுகுமுறை, மலேசியா MADANI கொள்கையின் கருணை, பரஸ்பர மரியாதை மற்றும் மக்கள் நலன் ஆகிய விழுமியங்களுக்கு ஏற்ப அமைவதாகவும் அவர் குறிப்பிட்டார்.
எனவே, நவம்பர் 8ஆம் தேதி தீபாவளிப் பண்டிகை கொண்டாடப்படுவதற்கு முன்னதாக, இவ்விவகாரத்தை JPA கவனத்தில் கொண்டு உரிய விளக்கத்தையும் பரிசீலனையையும் வழங்க வேண்டும் என அவர் நம்பிக்கை தெரிவித்தார்.