இத்தாக்கா, நியூயார்க்: அமெரிக்காவின் புகழ்பெற்ற கார்னெல் பல்கலைக்கழகம், ஏழு மாணவர்கள் மீதான கூட்டுப் பாலியல் வன்கொடுமைக் குற்றச்சாட்டுகளால் பெரும் நெருக்கடியைச் சந்தித்து வருகிறது. மாணவர்களின் தீவிரப் போராட்டங்கள், பேராசிரியர்களின் எதிர்ப்பு, மாநில அரசின் தலையீடு மற்றும் பல்கலைக்கழகத்தின் பொறுப்புணர்வு குறித்த கேள்விகள் என இந்த விவகாரம் தேசிய அளவில் கவனத்தை ஈர்த்துள்ளது.
ஊடகங்களாலும் சமூக ஆர்வலர்களாலும் ‘கார்னெல் 7’ (Cornell 7) என அழைக்கப்படும் இந்த வழக்கு, 2024ஆம் ஆண்டு அக்டோபர் மாதம் நடைபெற்றதாகக் கூறப்படும் சம்பவத்தை அடிப்படையாகக் கொண்டது.
அப்போது இரண்டாம் ஆண்டு படித்துவந்த மாணவி ஒருவர், சி ஃபை (Chi Phi) சகோதரத்துவ அமைப்பைச் சேர்ந்த ஏழு ஆண் மாணவர்கள் தனக்குப் போதைப்பொருள் கொடுத்து கூட்டுப் பாலியல் வன்கொடுமை செய்ததாகக் குற்றஞ்சாட்டியுள்ளார்.
தொடக்கத்தில் பல்கலைக்கழகத்தின் உள்விவகார விசாரணையாக இருந்த இந்தச் சம்பவம், தற்போது அமெரிக்கா முழுவதும் பாலியல் வன்கொடுமை வழக்குகளில் பல்கலைக்கழகங்களின் பொறுப்புணர்வு குறித்த விவாதமாக மாறியுள்ளது.
குறிப்பாக, ‘Instadocs: Jane Doe v. Cornell’ என்ற புதிய நெட்ஃபிளிக்ஸ் ஆவணப்படமும், TheCornell7.org என்ற இணையத்தளத்தின் வாயிலாக முன்னெடுக்கப்படும் விழிப்புணர்வுப் பிரசாரமும் இந்த விவகாரத்திற்கு மேலும் கவனத்தை ஈர்த்துள்ளன.
நீதி கோரும் போராட்டத்தின் பின்னணி
பாதிக்கப்பட்டதாகக் கூறப்படும் மாணவியின் ஆரம்பகட்டப் புகார்களைப் பல்கலைக்கழகமும் உள்ளூர் காவல்துறையும் கையாண்ட விதம் தொடர்பாக நீண்டகாலமாக அதிருப்தி நிலவி வந்தது.
2024ஆம் ஆண்டு நடைபெற்றதாகக் கூறப்படும் சம்பவத்தைத் தொடர்ந்து, டாம்ப்கின்ஸ் கவுண்டி மாவட்ட அரசு வழக்கறிஞர் அலுவலகம் குற்றவியல் வழக்குப் பதிவு செய்யப் போதிய நடவடிக்கை எடுக்கவில்லை எனக் கூறப்படுகிறது.
முழுமையான விசாரணைக்குப் பதிலாக, காவல்துறையின் சுருக்கமான நேர்காணல் அறிக்கையை மட்டுமே அடிப்படையாகக் கொண்டு இந்த முடிவு எடுக்கப்பட்டதாகத் தகவல்கள் தெரிவிக்கின்றன. இதனால் பாதிக்கப்பட்ட மாணவிக்கு ஆதரவாக இருந்தவர்கள் மத்தியில் கடும் அதிருப்தி ஏற்பட்டது.
இதற்கிடையில், பல்கலைக்கழகத்தின் Title IX விசாரணை வேறுபட்ட ஆதார மதிப்பீட்டு நடைமுறையின் அடிப்படையில் நடைபெற்றது.
அந்த விசாரணையின் முடிவில் குற்றச்சாட்டுக்கு உள்ளான ஏழு மாணவர்களும் பொறுப்புடையவர்கள் எனத் தீர்மானிக்கப்பட்டது. அவர்களில் இருவர் பல்கலைக்கழகத்திலிருந்து நிரந்தரமாக நீக்கப்பட்டனர். மற்ற ஐந்து பேருக்கு வெவ்வேறு கால அளவுகளில் இடைநீக்கம் அல்லது நன்னடத்தை கண்காணிப்பு நடவடிக்கைகள் விதிக்கப்பட்டன.
மேலும், சி ஃபை சகோதரத்துவ அமைப்பின் கார்னெல் பல்கலைக்கழகப் பிரிவு நிரந்தரமாகத் தடை செய்யப்பட்டது.
நீதிமன்ற வழக்கு கார்னெல் பல்கலைக்கழகத்திற்கு புதிய நெருக்கடி
2026ஆம் ஆண்டு செப்டம்பர் மாதத்தில், ‘ஜேன் டோ’ (Jane Doe) என்ற புனைப்பெயரில் பாதிக்கப்பட்டதாகக் கூறப்படும் மாணவி மிகப்பெரிய இழப்பீட்டு சிவில் வழக்கைத் தொடர்ந்ததைத் தொடர்ந்து இந்த விவகாரம் புதிய கட்டத்தை எட்டியது.
இந்த வழக்கு, குற்றச்சாட்டுக்கு உள்ளான ஏழு மாணவர்கள் மற்றும் சி ஃபை அமைப்பின் தேசியத் தலைமையகத்தை மட்டுமின்றி, கார்னெல் பல்கலைக்கழகத்தையும் மாணவி முன்பு உறுப்பினராக இருந்த பெண்கள் அமைப்பையும் குறிவைத்துள்ளது.
மாணவர்களின் பாதுகாப்பை உறுதிப்படுத்தத் தவறியது, நிறுவன ரீதியான அலட்சியம் மற்றும் சம்பவம் தொடர்பான விவரங்களை மறைக்க முயன்றது உள்ளிட்ட கடுமையான குற்றச்சாட்டுகள் வழக்கில் முன்வைக்கப்பட்டுள்ளன.
இந்த வழக்கு தொடர்பான விவரங்கள் பொதுவெளியில் வெளியானதைத் தொடர்ந்து பல்கலைக்கழக வளாகத்தில் போராட்டங்களும் எதிர்ப்புகளும் தீவிரமடைந்தன.
மாணவர் போராட்டங்கள் – பேராசிரியர்களின் எதிர்ப்பு
கடந்த சில வாரங்களாக இத்தாக்காவில் உள்ள கார்னெல் பல்கலைக்கழக வளாகத்தில் மாணவர்கள் தொடர்ந்து போராட்டங்களில் ஈடுபட்டு வருகின்றனர்.
இந்த வழக்கின் முழுமையான விவரங்களை வெளிப்படுத்த வேண்டும், பல்கலைக்கழக நிர்வாகம் வெளிப்படைத்தன்மையுடன் செயல்பட வேண்டும், மாணவர்களின் பாதுகாப்பை உறுதிப்படுத்தும் வகையில் கடுமையான சீர்திருத்தங்கள் மேற்கொள்ளப்பட வேண்டும் என்பன உள்ளிட்ட கோரிக்கைகளை மாணவர்கள் முன்வைத்துள்ளனர்.
இந்த எதிர்ப்பு மாணவர்களுடன் நின்றுவிடாமல், பல்கலைக்கழகப் பேராசிரியர்கள் மத்தியிலும் பரவியுள்ளது.
பல்கலைக்கழக நிர்வாகத்தின் செயல்பாடுகள் குறித்து அதிருப்தி தெரிவித்துள்ள பேராசிரியர்கள், நிர்வாகத் தலைமையின் மீது நம்பிக்கையில்லாத் தீர்மானம் கொண்டுவருவது தொடர்பான நடவடிக்கைகளையும் முன்னெடுத்துள்ளனர்.
நியூயார்க் மாநில அரசு தலையீடு – குற்றவியல் விசாரணை மீண்டும் தொடக்கம்
பல்கலைக்கழகத்தில் ஏற்பட்டுள்ள பெரும் எதிர்ப்பைத் தொடர்ந்து, நியூயார்க் மாநில அதிகாரிகள் இந்த விவகாரத்தில் அதிகாரப்பூர்வமாகத் தலையிட்டுள்ளனர்.
இதன் விளைவாக, ஏழு ஆண் மாணவர்கள் மீதான 2024ஆம் ஆண்டு குற்றச்சாட்டு தொடர்பான குற்றவியல் விசாரணை மீண்டும் தொடங்கப்பட்டுள்ளது.
மாநில அரசுத் தரப்பு வழக்கறிஞர்கள், அப்போது சேகரிக்கப்பட்ட ஆதாரங்களுடன், தற்போது சிவில் வழக்கின் விசாரணை நடவடிக்கைகளின்போது புதிதாக வெளிவந்துள்ள சாட்சியங்களையும் ஆய்வு செய்து வருகின்றனர்.
சட்டப் போராட்டங்கள் தொடர்ந்து அதிகரித்து வரும் நிலையில், கார்னெல் பல்கலைக்கழக வளாகத்திலும் கருத்து வேறுபாடுகள் நீடிக்கின்றன.
இந்த ‘கார்னெல் 7’ விவகாரம் தற்போது ஒரு பல்கலைக்கழகத்தைச் சார்ந்த தனிப்பட்ட பிரச்சினையாக இல்லாமல், அமெரிக்காவின் முன்னணி பல்கலைக்கழகங்கள் மற்றும் மாணவர் சகோதரத்துவ அமைப்புகளில் நடைபெறும் பாலியல் அத்துமீறல் குற்றச்சாட்டுகளை எவ்வாறு கையாள்கின்றன என்பது குறித்த தேசிய அளவிலான விவாதமாக உருவெடுத்துள்ளது.
