புக்கிட் ஜாலில், நவம்பர் 4 : “அரசாங்கத்தின் உதவியை மட்டுமே எப்போதும் எதிர்பார்த்திருக்கக் கூடாது” என்ற கருத்து, உள்ளூர் தொழில்முனைவோரின் முதிர்ச்சியையும் சுயமாக முன்னேற வேண்டும் என்ற மனப்பான்மையையும் வெளிப்படுத்துவதாகத் தேசிய ஒருமைப்பாட்டுத் துணை அமைச்சர் ஆர். யுனேஸ்வரன் தெரிவித்துள்ளார்.
அஜெண்டா சூரியா கம்யூனிகேஷன் நிறுவனத்தின் தலைமைச் செயல் அதிகாரி ஜக்கராவ் சிமான்சா வெளியிட்ட இந்தக் கருத்தைச் சுட்டிக்காட்டிய அவர், தொழில்முனைவோர் சுயமாக வளர ஊக்குவிக்கப்பட வேண்டும் என்றாலும், அவர்களின் சமூகப் பொருளாதார முன்னேற்றத்திற்குத் தேவையான வணிகச் சூழலை அரசாங்கம் தொடர்ந்து வழங்கி வருவதாகக் கூறினார்.
இதற்காக மலேசிய இந்திய சமூக உருமாற்றப் பிரிவான MITRA மூலம் RM150 மில்லியன் நிதி, பெண் தொழில்முனைவோர் மேம்பாட்டிற்கு RM200 மில்லியன் நிதி மற்றும் மனிதவள அமைச்சின் கீழ் பல்வேறு பயிற்சித் திட்டங்கள் வழங்கப்படுவதாகவும் அவர் தெரிவித்தார்.
இதற்கிடையில், அஜெண்டா சூரியா கம்யூனிகேஷன் ஏற்பாடு செய்துள்ள 24ஆவது தீபாவளி வர்த்தகக் கண்காட்சி 2026, 400க்கும் மேற்பட்ட விற்பனைக் கூடங்களுடன் பிரம்மாண்டமாக நடைபெற்று வருகிறது.
2002ஆம் ஆண்டு கோலாலம்பூர் பிரிக்ஃபீல்ட்ஸில் சுமார் 50 விற்பனைக் கூடங்களுடன் தொடங்கிய இந்தக் கண்காட்சி, தற்போது புக்கிட் ஜாலிலுக்கு விரிவடைந்துள்ளது.
இந்தக் கண்காட்சி இந்தியர்களின் பாரம்பரிய உடைகள், நகைகள், கைவினைப் பொருட்கள், உணவுகள் மற்றும் கலாசாரக் கலை நிகழ்ச்சிகளை உள்ளடக்கியுள்ளது.
தீபாவளி இந்திய சமூகத்திற்கான முக்கியப் பண்டிகை மட்டுமல்லாமல், மலேசியாவின் பன்முகக் கலாசார அடையாளத்தின் ஒரு பகுதியும் ஆகும் எனக் குறிப்பிட்ட யுனேஸ்வரன், பல்வேறு இனங்களைச் சேர்ந்த மக்கள் மற்றும் வெளிநாட்டுப் பார்வையாளர்களின் வருகை நாட்டின் கலாசாரப் பன்முகத்தன்மையை வெளிப்படுத்துவதாகத் தெரிவித்தார்.
மேலும், இத்தகைய நிகழ்ச்சிகள் இளைய தலைமுறையினர் தங்களது பாரம்பரியத்தை அறிந்துகொள்ளவும், பல்வேறு இன மக்களிடையே நல்லுறவையும் ஒற்றுமையையும் வளர்க்கவும் உதவுவதாக அவர் கூறினார்.