ஜோகூர் பாரு, நவம்பர் 4 : ஜோகூரில் அதிகரித்து வரும் தரவு மையங்களின் கட்டுமானம், அருகிலுள்ள குடியிருப்புப் பகுதிகளில் வசிப்போரிடையே கவலையை ஏற்படுத்தியுள்ளது. மின்சாரக் கோபுரங்கள், உயர் மின்னழுத்த மின்கம்பிகள் மற்றும் தொழில்துறை வசதிகள் குடியிருப்புகளுக்கு அருகில் அமைக்கப்படுவதால், சுற்றுச்சூழல் பாதிப்பு மற்றும் வீடுகளை மறுவிற்பனை செய்வதில் சிக்கல் ஏற்படலாம் என மக்கள் அச்சம் தெரிவிக்கின்றனர்.
இஸ்கந்தர் புத்ரியில் உள்ள ஈகோ பொட்டானிக் பகுதியில் வீடு வாங்கிய லீ ஷி சிங், அருகில் தரவு மையம் அமைக்கப்பட்டதுடன் உயர் மின்னழுத்த மின்கோபுரங்களும் நிறுவப்பட்டதால் தனது வீட்டை விற்பனைக்கு வைத்துள்ளார். ஆனால், கடந்த ஆறு மாதங்களாக இரண்டு பேர் மட்டுமே வீட்டை வாங்க ஆர்வம் தெரிவித்துள்ளதாக அவர் கூறினார்.
ஜோகூரில் தற்போது 65 தரவு மையத் திட்டங்கள் பல்வேறு அனுமதி நிலைகளில் உள்ளன. மாநிலத்தின் தரவு மையத் திறன் 2021ஆம் ஆண்டில் 10 மெகாவாட்டாக இருந்த நிலையில், தற்போது 1,110 மெகாவாட்டாக உயர்ந்துள்ளது.
இதற்கிடையில், சில குடியிருப்பாளர்கள் தரவு மையங்களால் தூசி, அதிக வெப்பம் மற்றும் தொடர்ந்து கேட்கும் இயந்திரச் சத்தம் போன்ற பிரச்சினைகள் ஏற்படுவதாகப் புகார் தெரிவித்துள்ளனர். நுசந்தாரா பிரிமா பகுதியில் மழலையர் பள்ளி நடத்தும் மோகனாம்பாள் ரெத்தினம், சுற்றுச்சூழல் குறித்த பெற்றோரின் கவலை காரணமாகப் பள்ளியில் மாணவர் சேர்க்கை 2025ஆம் ஆண்டில் 50 ஆக இருந்தது, 2026ஆம் ஆண்டில் 20 ஆகக் குறைந்துள்ளதாகக் கூறினார்.
மேலும், ஜோகூரில் வீடுகள் விற்பனையாகாமல் தேங்கியுள்ள நிலையும் இந்தக் கவலையை அதிகரித்துள்ளது. 2026ஆம் ஆண்டின் முதல் ஆறு மாதங்களில் 4,222 வீடுகளும், 9,946 சேவை அடுக்குமாடி குடியிருப்புகளும் விற்பனையாகாமல் இருந்ததாக தேசிய சொத்துத் தகவல் மையம் தெரிவித்துள்ளது.
இந்நிலையில், மின்கம்பிகளால் ஏற்படும் மின்காந்தப் புலங்கள் குறித்த உடல்நலக் கவலைகளுக்கு அறிவியல் ஆதாரம் இல்லை எனக் கூற முடியாது என்றாலும், குடியிருப்புகள் மின்கம்பிகளிலிருந்து 200 முதல் 300 மீட்டர் தொலைவில் இருந்தால் ஆபத்தான மின்காந்தப் பாதிப்பு ஏற்படுவதாக அறிவியல் ஆதாரங்கள் தெரிவிக்கவில்லை என மலேசிய தொழில்நுட்பப் பல்கலைக்கழகப் பேராசிரியர் மொஹமட் ஃபாதில் முகமட் டின் விளக்கினார்.
வேகமான பொருளாதார வளர்ச்சிக்காக அமைக்கப்படும் உள்கட்டமைப்புகள், அதே நேரத்தில் அருகிலுள்ள வீடுகளின் மதிப்பையும் குடியிருப்புச் சூழலையும் பாதிக்கக்கூடும் எனச் சொத்துத் துறை நிபுணர்கள் சுட்டிக்காட்டியுள்ளனர்.