கோலாலம்பூர்: பாரிசான் நேஷனல் (BN) கூட்டணியின் உள்விவகாரங்களில் தலையிடுவதைத் தவிர்த்து, பி.கே.ஆர். தனது கட்சியை வலுப்படுத்துவதிலும் எதிர்வரும் தேர்தல்களுக்குத் தயாராவதிலும் கவனம் செலுத்த வேண்டும் என ம.இ.கா. தேசிய வியூக இயக்குநர் டத்தோ சி. சிவராஜ் வலியுறுத்தியுள்ளார்.
ஒவ்வொரு கட்சிக்கும் தனது அரசியல் எதிர்காலத்தைத் தீர்மானிக்கும் உரிமை இருப்பதாகக் குறிப்பிட்ட அவர், பி.என். கூட்டணியின் உறுப்புக் கட்சிகளின் முக்கியத்துவம் குறித்து பி.கே.ஆர். கேள்வி எழுப்பத் தேவையில்லை என்றார்.
“அரசியல் முதிர்ச்சியைப் பற்றிப் பேச விரும்பினால், முதலில் மற்ற கட்சிகள் தங்களது அரசியல் பாதையைத் தாங்களே தீர்மானிக்கும் உரிமையை மதிக்க வேண்டும். அரசியல் என்பது கொள்கைகள், மக்கள் சேவை மற்றும் மக்களின் நம்பிக்கையை அடிப்படையாகக் கொண்டிருக்க வேண்டும்,” என அவர் செவ்வாய்க்கிழமை வெளியிட்ட இன்ஸ்டாகிராம் அறிக்கையில் தெரிவித்தார்.
இதற்கிடையில், சபா மாநிலத் தேர்தலில் ஏற்பட்டதாகக் கூறப்படும் திருப்தியற்ற செயல்திறன் மலாக்கா மாநிலத் தேர்தலிலும் மீண்டும் நிகழாமல் இருக்க, பி.கே.ஆர். புதிய தேர்தல் வியூகத்தை உருவாக்க வேண்டும் என்றும் சிவராஜ் கேட்டுக்கொண்டார்.
முதலீடு, வர்த்தகம் மற்றும் தொழில்துறை துணை அமைச்சர் சிம் சே சின், பி.கே.ஆர். முன்னாள் துணைத் தலைவர் ரஃபிஸி ரம்லி அறிமுகப்படுத்திய வியூகத்தைத் தொடர்ந்து, 16ஆவது பொதுத் தேர்தலை (PRU16) எதிர்கொள்வதற்கான புதிய அணுகுமுறையை ஆராய வேண்டும் என்றும் அவர் வலியுறுத்தினார்.
முன்னதாக, அம்னோவுக்கும் ம.சீ.ச.வுக்கும் இடையிலான அண்மைய கருத்து வேறுபாடுகள் குறித்து கருத்துத் தெரிவித்த சிம், அம்னோ தனது முன்னாள் அரசியல் எதிரியான பாஸ் கட்சியுடன் ஒத்துழைக்க முயல்வது, ம.சீ.ச. மற்றும் ம.இ.கா. ஆகிய கட்சிகளின் செல்வாக்கைக் குறைத்து, அவற்றின் கருத்துகள் புறக்கணிக்கப்படும் நிலையை ஏற்படுத்தக்கூடும் எனக் குறிப்பிட்டிருந்தார்.