அமெரிக்கா, நவம்பர் 4 : கர்ப்பிணியான தனது காதலிக்கு மயக்க மருந்து கலந்த பானத்தைக் கொடுத்து, அவரது விருப்பத்திற்கு மாறாக கருக்கலைப்பு மாத்திரைகளைப் பயன்படுத்தி கருக்கலைப்பு ஏற்படுத்தியதாக முன்னாள் வெஸ்ட் பாயிண்ட் ராணுவக் கல்லூரி மாணவர் காலேப் டி. சுஹ் மீது வழக்குத் தொடரப்பட்டுள்ளது.
2022ஆம் ஆண்டு இருவரும் வெஸ்ட் பாயிண்ட் கல்லூரியில் பயின்றபோது இந்தச் சம்பவம் நிகழ்ந்ததாகப் புதிய வழக்கில் தெரிவிக்கப்பட்டுள்ளது. கர்ப்பத்தைத் தொடர விரும்பிய பெண்ணுக்கு, கர்ப்பிணிகளுக்கான ஊட்டச்சத்துப் பானம் எனக் கூறி, சானாக்ஸ் மற்றும் ப்ரோமெதசின் உள்ளிட்ட மயக்க மருந்துகள் கலந்த பானத்தை அவர் கொடுத்ததாகக் குற்றஞ்சாட்டப்பட்டுள்ளது.
அந்தப் பெண் மயக்கமடைந்த நிலையில், அவரது அனுமதியின்றி கருக்கலைப்பு மாத்திரைகள் செலுத்தப்பட்டதாகவும், இதனால் அவர் கருச்சிதைவுக்கு உள்ளானதாகவும் வழக்கு ஆவணங்கள் தெரிவிக்கின்றன. பின்னர் மருத்துவமனையில் அவருக்குச் சிகிச்சை அளிக்கப்பட்டது.
மேலும், இணைய மருந்தகத்தில் பெண்ணின் அடையாளத்தைப் பயன்படுத்தி போலிக் கணக்கு உருவாக்கி கருக்கலைப்பு மாத்திரைகளைப் பெற்றதுடன், மயக்க மருந்தையும் நண்பர் மூலம் பெற்றதாக சுஹ் நீதிமன்றத்தில் ஒப்புக்கொண்டுள்ளார்.
இந்தச் சம்பவம் தொடர்பாக அவர் மீது கடுமையான தாக்குதல் குற்றச்சாட்டு பதிவு செய்யப்பட்டு, கடந்த ஜூன் மாதம் அவர் குற்றத்தை ஒப்புக்கொண்டார். தற்போது தண்டனைக்காகக் காத்திருக்கும் அவருக்கு இரண்டு ஆண்டுகள் சிறைத்தண்டனை விதிக்குமாறு அரசுத் தரப்பு கோரியுள்ளது.
இதற்கிடையில், அவர் கார்னெல் பல்கலைக்கழகத்தில் இளங்கலைப் பட்டம் பெற்று, பின்னர் கொலம்பியா பல்கலைக்கழகத்தின் பொதுச் சுகாதார முதுநிலைப் படிப்பில் சேர்ந்ததாக வழக்கில் குறிப்பிடப்பட்டுள்ளது. அவரது குற்றப் பின்னணி குறித்து தகவல் அறிந்த பின்னர் கொலம்பியா பல்கலைக்கழகம் நடவடிக்கை எடுத்ததாகவும் தெரிவிக்கப்பட்டுள்ளது.
பாதிக்கப்பட்ட பெண்ணின் வழக்கறிஞர், கர்ப்பத்தைத் தொடர விரும்பிய நிலையில் குழந்தையை இழந்ததுடன், தனது உடல் தொடர்பான முடிவெடுக்கும் உரிமையும் பறிக்கப்பட்டதால் அவர் கடுமையான மனவேதனைக்கு உள்ளாகியுள்ளதாகத் தெரிவித்துள்ளார்.