கோலாலம்பூர்: அடிமட்ட கால்பந்து வளர்ச்சிக்கு அரசாங்கம் கூடுதல் ஆதரவு வழங்கத் தவறினால், அடுத்த 10 முதல் 20 ஆண்டுகளில் மலேசியாவின் கால்பந்து வீரர்களை உருவாக்கும் கட்டமைப்பு கடுமையாகப் பாதிக்கப்படலாம் என நாடாளுமன்ற உறுப்பினர் ஜக்ரி ஹசான் எச்சரித்துள்ளார்.
நாடாளுமன்ற விவாதத்தின்போது இந்த எச்சரிக்கையை விடுத்த கங்கார் நாடாளுமன்ற உறுப்பினரான அவர், மலேசியாவின் 15 வயதுக்குட்பட்ட தேசிய கால்பந்து அணி தற்போது போட்டித்திறனுடன் விளங்கினாலும், எதிர்காலத்தில் வீரர்களை உருவாக்கும் அமைப்பில் பெரும் சிக்கல்கள் ஏற்படக்கூடும் என்றார்.
இதனைத் தவிர்க்க, தேசிய கால்பந்து மேம்பாட்டுத் திட்டத்திற்கு (NFDP) கூடுதல் நிதி ஒதுக்கீடு செய்யப்பட வேண்டும் என்றும் அவர் வலியுறுத்தினார்.
இளைஞர் மற்றும் விளையாட்டுத் துறை அமைச்சர் தௌஃபிக் ஜொஹாரி, பிரதமர் அல்லது நிதி அமைச்சுடன் நேரடியாகப் பேச்சுவார்த்தை நடத்தி, இத்திட்டத்துக்கான நிதியை அதிகரிக்க நடவடிக்கை எடுக்க வேண்டும் என்றும் ஜக்ரி கேட்டுக்கொண்டார்.
போதிய நிதி கிடைக்காவிட்டால், நாட்டின் இளம் கால்பந்து வீரர்களை உருவாக்கும் திட்டம் பாதிக்கப்படும் என்றும் அவர் எச்சரித்தார்.
இதற்குப் பதிலளித்த தௌஃபிக், அடிமட்ட கால்பந்து வளர்ச்சியில் உள்ள கட்டமைப்புச் சிக்கல்களை ஒப்புக்கொண்டதுடன், அவற்றைச் சரிசெய்வதற்கான நடவடிக்கைகள் ஏற்கெனவே மேற்கொள்ளப்பட்டு வருவதாகத் தெரிவித்தார்.
தற்போதைய 15 வயதுக்குட்பட்ட தேசிய அணியில் இடம்பெற்றுள்ள 16 வீரர்கள், பகாங் மாநிலம் கம்பாங்கில் அமைந்துள்ள மொக்தார் தஹாரி அகாடமியில் (AMD) பயிற்சி பெற்றவர்கள் என்றும் அவர் குறிப்பிட்டார்.
இந்த அகாடமியில் தற்போது 28 பயிற்சியாளர்களின் வழிகாட்டுதலின் கீழ் 199 வீரர்கள் பயிற்சி பெற்று வருகின்றனர்.
மேலும், மலேசியாவின் உள்ளூர் கால்பந்து திறமைகளை நீண்டகால அடிப்படையில் வளர்த்து, வீரர்களை உருவாக்கும் திட்டத்தின் நிலைத்தன்மையை உறுதிப்படுத்துவதற்காக தேசிய கால்பந்து மேம்பாட்டுத் திட்டத்தில் தேவையான மேம்பாடுகள் குறித்து ஆய்வு செய்யப்பட்டு வருவதாக அமைச்சர் தெரிவித்தார்.