கோலாலம்பூர்: மலேசிய இந்திய மக்கள் கட்சி (MIPP), பெரிக்காத்தான் நேஷனல் (PN) கூட்டணியின் தலைமையுடன் நடத்திய பேச்சுவார்த்தையில் உடன்பாடு எட்டப்படாததைத் தொடர்ந்து, மலாக்கா மாநிலத் தேர்தலில் போட்டியிடும் முடிவிலிருந்து விலகுவதாக அறிவித்துள்ளது.
பொருத்தமற்ற தொகுதிகளுக்காகப் போட்டியிடுவதைவிட, கட்சியின் கண்ணியத்தையும் போராட்டக் கொள்கைகளையும் பாதுகாப்பதே முக்கியம் என MIPP தெரிவித்துள்ளது.
“அரசியல் ஆதாயத்திற்காக எங்களது கொள்கைகளை ஒருபோதும் விட்டுக்கொடுக்க மாட்டோம். வெறும் வேட்பாளராக நிற்க வேண்டும் என்பதற்காக மட்டும் சமரசம் செய்துகொள்ளும் கட்சி MIPP அல்ல,” என அக்கட்சி குறிப்பிட்டுள்ளது.
அரசியல் கூட்டணியில் ஒற்றுமை, பரஸ்பர மரியாதை மற்றும் அனைவரையும் உள்ளடக்கிய அணுகுமுறை ஆகியவை முக்கியமானவை என்றும் MIPP வலியுறுத்தியுள்ளது.
ஒரு வலுவான கூட்டணி என்பது குறிப்பிட்ட சில கட்சிகளின் பலத்தை மட்டுமே சார்ந்திருக்கக் கூடாது என்றும், அனைத்து உறுப்புக் கட்சிகளின் நலன்களையும் மதித்து, பரஸ்பர நம்பிக்கை மற்றும் ஒத்துழைப்பின் அடிப்படையில் அமைய வேண்டும் என்றும் அது தெரிவித்துள்ளது.
மலேசிய இந்திய சமூகத்தின் நலன்களை கண்ணியத்துடனும் உறுதியான கொள்கைகளுடனும் பாதுகாப்பதே MIPP-இன் முக்கிய நோக்கம் எனக் குறிப்பிட்ட அக்கட்சி, நாட்டின் அரசியல் சூழலில் இந்திய சமூகத்தின் குரலுக்கும் நலன்களுக்கும் உரிய அங்கீகாரம் வழங்கப்பட வேண்டும் என்ற நிலைப்பாட்டையும் மீண்டும் வலியுறுத்தியுள்ளது.
பேச்சுவார்த்தையில் இணக்கம் ஏற்படாத நிலையில், கட்சியின் கொள்கைகள், கண்ணியம் மற்றும் போராட்ட இலக்குகளை அடிப்படையாகக் கொண்டு இந்த முடிவு எடுக்கப்பட்டதாக MIPP தலைவர் எஸ்.பி. புனிதன் தெரிவித்துள்ளார்.
“தொகுதிகளைப் பெறுவதற்கான வாய்ப்புகள் இருக்கலாம்; ஆனால் போராட்டத்தின் கண்ணியத்தை ஒருபோதும் அடகு வைக்க முடியாது,” என அவர் கூறினார்.