கோலாலம்பூர், அக். 29: மலேசியாவில் 17 லட்சம் அரசு ஊழியர்கள் பயன்படுத்துவதற்காக அறிமுகப்படுத்தப்பட்ட TuJu வழிகாட்டிச் செயலிக்குப் பதிலாக, நம்பகமான தற்காலிக மாற்றுச் செயலியை அரசாங்கம் ஏற்பாடு செய்ய வேண்டும் என்றும், இளம் மலேசியர்கள் புதிய, திறமையான சாலை வழிகாட்டிச் செயலியை உருவாக்குவதற்குத் திறந்த ஒப்பந்தப்புள்ளி முறையை அறிமுகப்படுத்த வேண்டும் என்றும் பாகான் நாடாளுமன்ற உறுப்பினர் லிம் குவான் எங் கோரிக்கை விடுத்துள்ளார்.
Waze செயலியின் பயன்பாட்டுக்குத் தடை விதித்து, அதற்குப் பதிலாக TuJu செயலியைப் பயன்படுத்துமாறு பிரதமர் டத்தோஸ்ரீ அன்வார் இப்ராஹிம் அறிவுறுத்தியதைத் தொடர்ந்து, பல அரசு ஊழியர்கள் எந்தச் செயலியைப் பயன்படுத்துவது என்பது குறித்து குழப்பமடைந்துள்ளதாகத் தமக்குப் புகார்கள் கிடைத்துள்ளதாக லிம் தெரிவித்தார்.
மலேசிய நெடுஞ்சாலை ஆணையம் (LLM) மற்றும் Prosignal Consortium Sdn Bhd (PCSB) இணைந்து உருவாக்கிய TuJu செயலி, தேசியப் பாதுகாப்புக் காரணங்களுக்காக Waze-க்குப் பதிலாக அறிமுகப்படுத்தப்பட்டதாகக் கூறப்பட்டாலும், எதிர்பார்த்த பயன்பாட்டை வழங்கவில்லை என அவர் விமர்சித்தார்.
நெடுஞ்சாலைகளுக்கு மட்டுமே TuJu முன்னுரிமை
LLM தலைவரும் அம்னோவின் சிம்பாங் ரெங்காம் நாடாளுமன்ற உறுப்பினருமான டத்தோஸ்ரீ ஹஸ்னி முகமது, TuJu செயலி அனைத்து சாலைகளிலும் Waze-க்கு நேரடிப் போட்டியாகச் செயல்படுவதற்காக உருவாக்கப்படவில்லை என்று தெரிவித்திருப்பதை லிம் சுட்டிக்காட்டினார்.
மாறாக, சுங்கக் கட்டணம் வசூலிக்கப்படும் நெடுஞ்சாலைகளில் பயணிப்போருக்கு கூடுதல் சேவைகளை வழங்குவதே TuJu செயலியின் முதன்மை நோக்கம் என ஹஸ்னி கூறியதாக அவர் குறிப்பிட்டார்.
போக்குவரத்து நிலவரம், ஓய்விடங்கள், அமலாக்கக் கண்காணிப்புக் கேமராக்கள் அமைந்துள்ள இடங்கள் மற்றும் அவசர உதவிக்கான தொடர்பு விவரங்கள் ஆகியவற்றை வழங்குவது இச்செயலியின் முக்கிய அம்சங்களாகும்.
மேலும், TuJu செயலியை மத்திய அரசுச் சாலைகள், நகராட்சி சாலைகள் மற்றும் கிராமப்புறச் சாலைகளுக்கும் விரிவுபடுத்த இன்னும் 10 முதல் 15 ஆண்டுகள் வரை ஆகலாம் என ஹஸ்னி தெரிவித்ததாக லிம் கூறினார்.
இதன்படி, 17 லட்சம் அரசு ஊழியர்களின் தேவைகளுக்கு TuJu தற்போது போதுமானதாக இல்லை என்றும், Waze-க்கு மாற்றாக அதைப் பயன்படுத்துமாறு பிரதமருக்கு தவறான தகவல்கள் வழங்கப்பட்டிருக்கலாம் என்றும் லிம் குற்றஞ்சாட்டினார்.
மாற்றுச் செயலிக்கு திறந்த ஒப்பந்தப்புள்ளி தேவை
தற்போது Waze-ஐப் பயன்படுத்த முடியாத நிலையில், TuJu செயலியும் முடக்கப்பட்டுள்ளதாகக் கூறப்படும் சூழலில், அரசு ஊழியர்கள் தங்களது பயணங்களுக்கு எந்த வழிகாட்டிச் செயலியைப் பயன்படுத்துவது என்ற கேள்வி எழுந்துள்ளதாக லிம் தெரிவித்தார்.
எனவே, TuJu திட்டத்தை மறுபரிசீலனை செய்து, நம்பகமான தற்காலிக மாற்றை அரசாங்கம் உடனடியாக ஏற்பாடு செய்ய வேண்டும் என அவர் வலியுறுத்தினார்.
அத்துடன், இளம் மலேசியர்கள் புதிய மற்றும் திறமையான சாலை வழிகாட்டிச் செயலியை உருவாக்குவதற்கான வாய்ப்பை வழங்கும் வகையில், வெளிப்படையான திறந்த ஒப்பந்தப்புள்ளி நடைமுறையையும் அரசாங்கம் முன்னெடுக்க வேண்டும் என்றார்.