கோலாலம்பூர், நவம்பர் 3: கிராமப்புற மற்றும் வட்டார மேம்பாட்டு அமைச்சின் நிதி ஒதுக்கீடுகள் தொடர்பாக நாடாளுமன்ற உறுப்பினர் ஒருவர் பயன்படுத்திய ‘சதி’ (Sabotage) என்ற சொல், 2027ஆம் ஆண்டுக்கான வரவு செலவுத் திட்ட விவாதத்தின்போது கடும் வாக்குவாதத்தை ஏற்படுத்தியது.
சபா, சரவாக் மாநில மக்கள் மற்றும் தீபகற்ப மலேசியாவின் கிராமப்புற மக்கள், அபிவிருத்தித் திட்டங்கள் ரத்து செய்யப்பட்டதால் பாதிக்கப்பட்டுள்ளதாகத் துணைப் பிரதமரும் கிராமப்புற மற்றும் வட்டார மேம்பாட்டு அமைச்சருமான டத்தோஸ்ரீ டாக்டர் அஹ்மட் ஸாஹிட் ஹமிடி அண்மையில் தெரிவித்திருந்தார்.
இந்தக் கருத்து குறித்து கேள்வி எழுப்பிய பக்காத்தான் ஹராப்பான் கூட்டணியின் ஜெலுத்தோங் நாடாளுமன்ற உறுப்பினர் ஆர்.எஸ்.என். ராயர், இரண்டாவது நிதியமைச்சர் டத்தோஸ்ரீ அமிர் ஹம்ஸா அஸிஸான் அளித்த விளக்கத்துடன் இது முரண்படுவதாகக் கூறினார்.
எந்தவொரு நிதி ஒதுக்கீடும் குறைக்கப்படவில்லை அல்லது திரும்பப் பெறப்படவில்லை என்று இரண்டாவது நிதியமைச்சர் விளக்கியுள்ள நிலையில், அஹ்மட் ஸாஹிட்டின் கருத்து பொதுமக்களிடையே குழப்பத்தை ஏற்படுத்தியுள்ளதாக ராயர் தெரிவித்தார்.
“பாகான் டத்தோ நாடாளுமன்ற உறுப்பினர் வெளியிட்ட கருத்து, சபா மற்றும் சரவாக் மாநிலங்களுக்கான நிதி ஒதுக்கீடுகள் தியாகம் செய்யப்பட்டுவிட்டதைப் போன்ற தோற்றத்தை ஏற்படுத்தியுள்ளது,” என்று அவர் கூறினார்.
மேலும், சபா, சரவாக் மற்றும் தீபகற்ப மலேசியாவின் கிராமப்புறங்களில் நிலவும் உள்கட்டமைப்பு பிரச்சினைகள் குறித்து அஹ்மட் ஸாஹிட்டுக்கும் மடானி அரசாங்கத்துக்கும் அக்கறை இல்லை என்ற எண்ணத்தையும் இந்தக் கருத்துகள் ஏற்படுத்துவதாக அவர் தெரிவித்தார்.
“ஆனால், எந்தவொரு நிதி ஒதுக்கீடும் குறைக்கப்படவில்லை, நிதியும் திரும்பப் பெறப்படவில்லை என்று இரண்டாவது நிதியமைச்சர் தெளிவுபடுத்தியுள்ளார்.
“எனக்கே குழப்பமாக இருந்தால், பொதுமக்கள் எந்த அளவுக்குக் குழப்பமடைந்திருப்பார்கள் என்பதைச் சிந்தித்துப் பாருங்கள். மடானி அரசாங்கத்தைக் கவிழ்க்க பாகான் டத்தோ முயற்சி செய்கிறதா?” என்று ராயர் கேள்வி எழுப்பினார்.
அஹ்மட் ஸாஹிட்டின் கருத்துகள் சர்ச்சையை ஏற்படுத்தியுள்ளதாகவும், சபா மற்றும் சரவாக்கைச் சேர்ந்த பல நாடாளுமன்ற உறுப்பினர்களும் பொதுமக்களும் அரசாங்கத்தின் மீது அதிருப்தி தெரிவித்துள்ளதாகவும் ராயர் கூறினார்.
இந்த விவகாரம் குறித்து இதற்கு முன்னதாக கம்பார் நாடாளுமன்ற உறுப்பினர் சோங் சே மின் (PH-Kampar) தனது பட்ஜெட் விவாத உரையிலும் குறிப்பிட்டிருந்தார்.
இதற்கிடையில், ராயர் பயன்படுத்திய ‘சதி’ என்ற சொல் தேசிய முன்னணியின் அராவ் நாடாளுமன்ற உறுப்பினர் டத்தோஸ்ரீ டாக்டர் ஷாஹிதான் காசிமின் கடும் எதிர்ப்பைச் சந்தித்தது.
துணைப் பிரதமருக்கு எதிராக இத்தகைய குற்றச்சாட்டை முன்வைப்பது முறையற்றது என்று அவர் சாடினார்.
மேலும், ‘சதி’ என்ற சொல் பொதுவாகப் பாதுகாப்பு தொடர்பான விவகாரங்களில் பயன்படுத்தப்படுவதாகவும், அதைச் சாதாரணமாகப் பயன்படுத்தக்கூடாது என்றும் அவர் குறிப்பிட்டார்.
“இவர் நாட்டின் துணைப் பிரதமர். குறிப்பாக நாம் ஒரே அரசாங்கத்தில் இருக்கும்போது, அவருக்கு எதிராக இத்தகைய குற்றச்சாட்டை முன்வைக்க முடியாது,” என்று ஷாஹிதான் கூறினார்.
ராயரின் கருத்து தீய நோக்கத்துடன் முன்வைக்கப்பட்ட குற்றச்சாட்டு என வர்ணித்த அவர், மக்களவைத் தலைவர் டான்ஸ்ரீ ஜொஹாரி அப்துல் இந்த விவகாரத்தில் தலையிட வேண்டும் என்றும் கோரிக்கை விடுத்தார்.
இதனைத் தொடர்ந்து, கினாபத்தாங்கான் நாடாளுமன்ற உறுப்பினர் டத்தோ முகமட் குர்னியாவான் நைம் மொக்தாரும் (BN-Kinabatangan), மடானி அரசாங்கத்துக்கு எதிராகச் சதி நடைபெறுவதாகக் கூறிய குற்றச்சாட்டை ராயர் நிரூபிக்க வேண்டும் எனச் சவால் விடுத்தார்.
ஆனால், தமது கருத்தில் உறுதியாக இருந்த ராயர், எதிர்க்கட்சியினருடன் இணைந்து மடானி அரசாங்கத்தைக் கவிழ்க்கும் முயற்சியில் கூட்டுச் சதி நடைபெறுவதாகவும் குற்றம்சாட்டினார்.
சபையில் பலமுறை அமைதியைக் கடைப்பிடிக்குமாறு உறுப்பினர்களைக் கேட்டுக்கொண்ட மக்களவைத் தலைவர் ஜொஹாரி அப்துல், அஹ்மட் ஸாஹிட்டை உரிமைகள் மற்றும் சிறப்புரிமைக் குழுவின் விசாரணைக்கு உட்படுத்த விரும்பினால், அதற்கான தீர்மானத்தை ராயர் சமர்ப்பிக்க வேண்டும் என்று அறிவுறுத்தினார்.
இதனைத் தொடர்ந்து, பட்ஜெட் மீதான விவாதத்தைத் தொடருமாறு பாசிர் மாஸ் தொகுதியின் ரந்தாவ் பாஞ்சாங் நாடாளுமன்ற உறுப்பினர் டத்தோ சித்தி ஸைலா முகமட் யூசோப்புக்கு (PN-Rantau Panjang) ஜொஹாரி உத்தரவிட்டதை அடுத்து, சபையில் நிலவிய வாக்குவாதம் முடிவுக்கு வந்தது.